Alla Itolae Nusa 6
Kena tamata esi tapa boka kai esi lei etia-etia neka mei nusa, kai esi ruele kwete binaya,
hoko Alla Eni nanaru esi selu be kwete bina meru ntekita, eleki esi kai kwete bina meru lulu esi suka.
Hoko TUHANE Ibeteke be, “Au suka tamata esi rue eti pela mei nusa mo. Tamatare tanei kwanale rebe namake atiae, hoko suke esi mata. Esi rue mei nusare lesi bei musuna utune esa lesi butu lua mo.”
Kena mere, kai pela bei mere lekwe tamata raksasaya me esi mei nusa. Tamata raksasa meru esi rulu bei bina beluka rebe esi kai Alla Eni nanaru. Siere tamata ktilina kai elaka, kai pusue tamata kena nusa akmenare esi isikesi.
Eleki kena TUHANE Iselu be tamata mei nusare esi neu titinai kai esi noake batuke loko neune rame,
hoko Iblake sala kai Isusa titinai le Itola tamata mei nusare pe.
Eleki Ibeteke be, “Tamata rebe Au tolaise, Au punu pususi, kai pusue binatana rebe undete tetu kai umpe uere lekwe. Au blake sala titinai le Au tolasi mei nusa.”
Po Nu isupu misete elake bei TUHANE.
Nu eni hidupe elere: Nu mere tamata misete, kai iono tiae sasaisa mo bei pusue tamata kena nusa rebai mere. Kai ihidupe lulu Alla Eni sukare rame.
Nu eni nanae mokwaia telu, Seme, Yapeta kai Hame.
Kena mere nusare mise moneka le tamata esi ono neune titinai me Alla oaI peneka kai esi ono tiae ete lomai etia-etia neka.
Alla Iselu nusa meije, Iselu batuke neune neka le pusue tamata esi hidupe batuke esi ono neune ete lomai rame.
Eleki Alla Ibeteke loko Nu be, “Au teu lepate peneka leke taneia mei nusa meije punu pusulu. Le nusa meije penu kena ono neune ete lomai kai ono tiae ete lomai peneka, hoko Au atiasi sakesa kai nusa meije.
Hoko akerike kapale sae etemu bei ai gopire, kai aono esi sosokati mpai lale, kai akmulue kena tere kukuru bei mpai lale kai bei mei muli.
Hoko akerike kapale mere elere: esi nanuke metera utune esa lesi butu telu lesini telu, esi elake metera butu lua lesini lua kai esi nanuke loletere metera butu esa lesini telu.
Obi kapale mere esi ndete babare. Bei maka obi mere roma mpe lesete esi nuruije onoe mbeba sentia butu ata lesini ata. Kerike kapale mere esi sokati sae mpe lebu, sae kena esi tlaije kai sae ndete baba, kai ono metu kena kapale esi leine.
Le Au ono kwele lolo nusare repeneka leke pusue tanei kwanala mei nusare mata pusue.
Po ete ale, Au taluke misete ete ale. Akusu kena kapale mere sakesa kai amu bina, amu anaru kai esi binaru.
Kai bei pusue binatanaru akusue neli kai inai, tulene kai inai, tulale kai bata papelakelu lopai kapale esi laleije sakesa kai ale, leke punulu bei nusa meije yake.
Hoko bei pusue manua ooani, tulale kai bata uluake lokomu, bei pusue binatane lelala atare, neli kai inai uluake lokomu kai bei pusue binatana rebe umesare, neli kai inai lekwe uluake lokomu leke punulu bei nusa meije yake.
Kai akusue manane sasaisa neka ete imi kai ete binatanaru.”
Eleki Nu iono lulu pusue rebe Alla Iulake ionore.